(( الظـــــــــــوامي ))

(( الظـــــــــــوامي ))

يابن دعاس كيف حالك رد الخبر وأنت خابر
الوقت والناس والأرض ومجريات العلوم

يامن وهبت القصيده روح الشعر والمشاعر
كلمه ومعنى ومغنى تجلي ظلام الهموم

نهبت عين الحليله من غرف وارد وصادر
يا راعي الجود حاسب بعض الظوامي تحوم

لسان حالك جماعي من واقع الحال ظاهر
وحنا على حال ذاتي لا ندعي أو نلوم

جاوزت نظر القبيله فكر الخيال المعاصر
شليت روح الأصاله ورميت طفح الغثوم

المشيخه والرعيه صارت حديث المنابر
والآدمي شيخ نفسه ما حد بأمره يقوم

اما الصوارح بوارح ما تحتجب خلف ساتر
تركي عليها الثقيله والشد وقت اللزوم

من قال ان الحقيقه تخفي على عين ناظر
عين البصير المفتح تجتاز سبك الغيوم

من عود الناس عاده تجري عليه الخواطر
والناس كل حد بطبعه والخف دحقه رسوم

طرقت باب المدينه وطفت فوق البنادر
شفت الوجوه الفقيره تصب عرق الخشوم

شفت العيون الحيارى تناجي صمت الحناجر
تسعى وجهد المساعي ما حالفتها القسوم

والناس خلف المصالح تتبع بريق المظاهر
طارت جبال الضمائر على جناح الطعوم

واللي حياته حسبها ونظر بعينه لباكر
يغنم غياب المحاسب ويزيد نفسه رقوم

وان دار فلك الشدايد دحروا عليه المعاثر
تشوف وجه الصداقه لباس وجه الخصوم

رسمت حرفي قصيده من ريشة الغيم ماطر
جو الخريفي الطبيعي مفتاح باب الحلوم

هذا كلامي وأقبل اول سلامي واخر
أنته خبير المواسم عندك حساب النجوم







رد الشــاعر :- محمد احمد دعاس المعشنــــي


العــــــــــــــوابـــر

سلام بعد التحيه الى حفيد الأكابر
راجح بميزان نده وللجمايل غنوم

حيا عدد من ترجل على ظهور العوابر
أبو مسلم وصلنا يغطس وساعه يعوم

له باع ضافي وخبره يجتاز نوف العوابر
مهما تكون الصعوبه يغشي بقوه عزوم

ماهو كما بعض ناسن يرمون في كل عابر
الوقت يمضي عليهم على تسالي ونوم

نو الردايف ثقيله والريح من نجد سابر
عم الجبل والسواحل والغيم حامل سموم

على مدار المواسم أبوجبل دوم صابر
لاموه لما ترحم على الفؤاد الرحوم

يا فاهم الرمز مالك شفتك على الفوت شابر
مدري كذا أمر قاهر أم هو طواف القدوم

عندك مناهل غزيره والصوت بالنغم نابر
يطرب له كل سامع ياللكلام النظوم

الجمع من زود رايه مابين ناصح وضابر
والبعض مبهوت يبكي مثل الوليد الفطوم

الرأي ميدان واسع ما هو كضيق العنابر
مثلك دريك المعاني وفي المسائل فهوم

لا ندعي فهم زايد ولا شغلنا مسابر
إذا لهجنا بكلمه من صمت في كل يوم

إن كنت ناوي لسفره باتقوم خلفك طوابر
بشر ترى الناس فطرت من بعد شده وصوم

وانعم سعيفي وزهلك خلي كلام البرابر
ما كل مبذور ينبت والقحط ما بايدوم

ما عاد حاجه نحلل حاضر ولا عهد غابر
ذيك السلاسه نراها مع الشيوخ العموم

مات المداوي وخلفوا رجال كلا يثابر
على النقاش المخالف بالتفرقه والهجوم

الشيخ سعيه محدد على الورق والمحابر
إذا ختم أو بصمها قد شاف نفسه خدوم

سامح وأقبل سلامي تعداد مقبل ودابر
يا مرتفع ما يوطي نفسه لزله ولوم .




حســــن الـــرواس (( بوغــــــلاب ))



علم الفلك والنوخذى والسفينه
صحــبه ولو مرت عواصف وطوفــــان

والود والمعروف روح السكينــه
للأدمي زينه وحجه وبرهـــــــــــــــــــان

والجود في أهــل العقول الرزينه
رأس المعزه لي لهم يـــد ولســـــــــــان

كلن جنــى محصول نبتـه وطينـه
والأرض فيــها زرع من كــل ألــــــوان

درب السفر أسوار ما هي هوينــه
من قد نوى للســــير يحتـــــاج عنــــوان

حتى يميز بين صعـــبه ولينـــــــه
ويبلغ المقصود والأمـــر والشـــــــأن

يـــــانجم ســامر فوق شرق المدينه
ظوي على دربـــات وسهول حمـــــران

وأحمل لبـــن دعــاس بشرى ثمينـه
الغيــث عم الأرض والريــف مــــــزدان

والسيل في الوديــان يدوي حنينــه
والمــوج بالترحـــاب يلقــــاه زفــــــــان

واللي صغى للغير يمسي رهينـــــه
لا مشتري يدفــع ولا فضل واحســـــــان

لـــو يستقيــم الوقت بأعبر سنينـــــه
واسمر مع الخطـــار سالـي ونشــــــــران

وأبني جســـور الود بيني وبينـــــــه
دام الوســــــع موجـود والسر ما بـــــــان

وأختم اذا الهــوجــاس نادى قرينــــه
وأظمن يجيني الــــــرد منك بميـــــــــزان